Бөгөн Сибай ҡалаһы “Аҡбуҙат” балалар баҡсаһында талантлы педагог Гөлнара Марат ҡыҙы Йыһангированың «Бәхет ҡуласаһы» шиғырҙар йыйынтығы китабының исем туйы булып үтте. Был йыйынтыҡҡа авторҙың төрлө йылдарҙа яҙылған кескәйҙәр өсөн тәғәйенләнгән шиғырҙары, йомаҡтары тупланған. Гөлнара Марат ҡыҙының шиғырҙары тәбиғәтте, йәнлектәрҙе, ҡоштарҙы яратырға, тыуған ер йылыһын тойорға өйрәтә.
Мәртәбәле сараға бик күп ҡунаҡтар килде. Саҡырылған ҡунаҡтар араһында Сибай ҡала башҡорттары ҡоролтайы ағзалары Ғәйнуллина Т.Ф., Айсыуаҡова Р.Ф., Сәмерханова Г. Х. , сәнғәт мәктәбе директоры Баянова Г.Ш., ҡала мәғариф идаралығы мәктәпкәсә белем биреү методисы Янбаева Л.Ш., башҡорт төркөмдәре тәрбиәселәре , тәрбиәләнеүселәре , шулай уҡ ауылдаштары, туғандары бар ине .
Ижад кисәһендә шулай уҡ Г.Йыһангированың шиғырҙарын яттан һөйләү буйынса ҡала кимәлендә ойошторолан конкурстың һөҙөмтәләренә лә йомғаҡ яһалды. Конкурс ике турҙа 3 йәш төркөмөнә бүленеп үткәрелде. Бөтәһе 265 бала ҡатнашты. Конкурс бик йәнле һәм сәмле барҙы. Шиғыр бәйгеһенең иң-иңдәрен һайлап алыу ҡоролтай ағзалары Рәсимә Фитрат ҡыҙы Айсыуаҡова һәм Гөлкәй Хәйҙәр ҡыҙы Сәмерханова иңенә төштө.
Бөтә кескәйҙәргә лә , балаларҙы әҙерләгән тәрбиәселәргә лә дипломдар, иҫтәлеккә бүләктәр тапшырылды.
Киләсәктә Гөлнара Марат ҡыҙының ижад ҡомарының һүнмәүен, балаларҙың кескәй генә йөрәгендә туған телгә һөйөү уятҡандай яңы шиғырҙар ижад итеүен теләйбеҙ.
|