"Уҡытыусы” - бөйөк исем! Был һүҙ ниндәй генә телдә әйтелһә лә, күңелдә оло хөрмәт һәм ихтирам уята! Һәр кемебеҙҙең йөрәгендә ул ҡәҙерле, ғәзиз кешеләребеҙ рәтенә ҡуйыла.
Уҡытыусы – тыуған илебеҙ киләсәген тәрбиәләгән, ил ғорурлығы һәм таянысы. Мәғариф системаһында ниндәй генә үҙгәрештәр булмаһын, улар һәр саҡ үҙ һөнәренә тоғро ҡала.
Бөгөн ҡала хәкимиәте бинаһында Уҡытыусылар көнөнә ҡарата тантаналы сара булып үтте. Балаларға белем -тәрбиә биреү эшендә оҙаҡ йылдар эшләүсе педагогтарҙы, үҙ һөнәрҙәренең оҫтаһы булыусыларҙы тәбрикләп Маҡтау ҡағыҙҙары тапшырылды.Шулар араһында
Аҡбуҙат балалар баҡсаһында оҙаҡ йылдар эшләүсе, фиҙакәр һәм тырыш хеҙмәт өлгөләре тип һаналған педагогтарҙың булыуы оло мәртәбә! Улар -уҡытыусы-логопед Айгөл Фәтих ҡыҙы Уразбаева һәм тәрбиәсе Гөлшат Ғиса ҡыҙы Тулубаева. Ысынлап та, кескәйҙәр йөрәгенә асҡыс яратыусы, күңелдәрендә тик изгелек уятыусы, бар ғүмерҙәрен балалар тәрбиәләүгә бағышлаған был педагогтар оло маҡтауға лайыҡ! Киләсәктә лә эшегеҙҙән йәм һәм ҡыуаныс алып, аҡыллы,уңған, рухлы балалар тәрбиәләргә яҙһын!
Бөгөн шулай уҡ яңы уҡыу йылына әҙерлек буйынса йомғаҡлау булып үтте. Тырыш, уңған Аҡбуҙат балалар баҡсаһы коллективы 1 урынға лайыҡ булды! Был еңеү- дөйөм һәм берҙәм эш һөҙөмтәһе! Балаларға уңайлы һәм хәүефһеҙ шарттар булһын өсөн тырышты хеҙмәткәрҙәр!
Беҙҙең эшебеҙҙә бар яҡлап та ярҙам күрһәткән ата-әсәләргә лә ҙур рәхмәтебеҙҙе белдерәбеҙ!